文／黃美貞，苗栗客家人，臺北市光復國小个先生， 這下戴臺北市。（腔頭 ：四縣腔）
有一種燒暖安到轉妹家个燒暖，有妹家好轉个妹仔當幸福，有爺哀好使妮（註1），分享生活中个滴滴溚溚（註2），雖然當多事情還係愛自家來擔，毋過，轉去食一下老乳，毋使想忒多，將身份暫時變成細人仔，成半日仔乜試著當樂線。
記得正嫁人該下，灶下个事頭毋熟絡，想著轉夜愛煮食斯難耐，該央時毋比得現下，有利便个網路好查，有詳細个影片好看，係堵著問題，第一個想著个，就係打電話問阿姆。頭胎仔擐人（註3），麼个就毋想食，就願愛食番瓜燜飯，這係阿姆个手路菜，從細食到大。逐年番瓜收成，看著閒間仔（註4）排列个番瓜，𠊎就愛嘺阿姆燜番瓜飯。現下自家動手，照阿姆个口訣，愛先放油熻番瓜，半生熟仔有香氣出來，攞米共下炒，正放在電鑊仔蒸。食著第一口番瓜飯該下，暢到差一息仔跳起來。
阿姆無在了，灶下換阿哥主意，鑊剷換阿哥來拿，過節愛㓾雞捋鴨、敬神拜喏，四炆四炒這兜事頭，好在有阿哥來打算，正有豐湧个節慶。尤其筍乾係用山項个大竻竹矺个，在山頂劈好載轉屋，擘竹殼就有一手好做，冷水落鑊煮到水滾，撙細火還愛半點鐘，撈起來換水煮加半點鐘，正做得裝袋用石頭矺出酸水，矺有了兩日，晒分佢燥水，歸百斤个竹筍變筍乾，淨伸兩斤定定。用自家畜个雞鴨煠出來个肥湯炆筍乾，係轉妹家正食得著个好料仔。
客家人个炒肉，既經變成餐廳个基本菜色，這恁多年，客委會逐年還有辦料理比賽，毋過𠊎盡合意阿哥炒个。愛用拜過喏个三層（註5），切到拈食指恁大垤，還有浸軟个魷魚仔，膜仔定定仔擘淨，切到像手指尾大，三層𤐙畀出油再爆魷魚仔、蝦米，落尾加大把个蔥白、米酒、米醬摎豆油，炒到錐錐（註6）一大鑊，像辦桌樣仔，單淨用看个就像係一件藝術品。
打幫阿哥盡多，久久仔轉一下妹家，總係親身煮食招待，該餐便菜飯仔，就像仙丹樣仔，麼个操煩都毋見忒了。
（註1）使妮：音saiˊ naiˊ；撒嬌。
（註2）滴滴溚溚：音didˋ didˋ dabˋ dabˋ；零零星星的樣子。
（註3）擐人：kan nginˇ；懷孕。
（註4）閒間仔：hanˇ gienˊ eˋ；閒置、沒有使用的房間。
（註5）三層：samˊ cenˇ；五花肉。豬腹脅處的肉，肥瘦夾雜有層次，故稱「三層肉」。
（註6）錐錐：zuiˊ zuiˊ；尖尖的，形容東西堆成錐狀。
華語
有一種溫暖叫做回娘家的溫暖，有娘家可以回的女兒很幸福，有父母可以撒嬌，分享生活中的點點滴滴，雖然很多事情還是要自家承擔，但是，回去喝一下老奶，不用想太多，將身份暫時變成小孩子，半天也覺得很快樂。
記得才剛嫁人時，不熟悉廚房的事，每當下班要要煮晚餐就很煎熬，那時不比現在，有方便的網路好查，有詳細的影片可以看，若是遇到問題，第一個想到的，就是打電話問媽媽。懷第一胎時，什麼都不想吃，就想著要吃南瓜燜飯，這是媽媽的拿手菜，從小吃到大。每年南瓜收成，看著儲藏室排列的南瓜，我就吵著媽媽煮燜南瓜飯。現在自己動手，照著媽媽的口訣，要先放油燜南瓜，半熟時會有香氣出來，和白米一起炒，再放進電鍋一起煮。吃第一口南瓜飯時，開心到差一點跳起來。
媽媽不在了，廚房換哥哥當家，鍋剷換哥哥來拿，過節要殺雞殺鴨、敬神拜祖，四炆四炒這些事，還好有哥哥來張羅，才有豐盛的節慶。尤其筍乾是用山上的大刺竹做的，在山頂劈好載回家，光是剝竹殼就很費工，冷水下鍋煮到水滾，轉小火還要半個鐘頭，撈起來換水再煮半小時，才可以裝袋用石頭重壓擠出酸水，重壓兩天，晒到成了乾，上百斤的竹筍變筍乾，才剩兩斤而已。用自養的雞鴨煮出來的肥湯熬筍乾，是回娘家才吃得到的好料。
客家人的炒肉，已經變成餐廳的基本菜色，這麼多年，客委會每年還辦料理比賽，不過我最中意哥哥炒的。要用拜過三層肉，切到像食指的大小，還有泡軟的魷魚，膜要慢慢的剝乾淨，切到像小指大，三層肉煸道出油再爆香魷魚、蝦米，最後加大把的蔥白、米酒、米醬摎豆油，炒到滿滿一大鍋，像辦桌一樣，單用看的就像係一件藝術品。
勞煩哥哥很多，久久回一下娘家，總是親自下廚招待，那餐家常料理，就像仙丹一樣，什麼煩惱都不見了。
