文／張博舜，地方文化暨社區創生工作者，桃園楊梅伯公岡四湖客家人，感謝薪傳師邱鴻春先生指導客語寫作（海陸腔）
伯公岡一溜里來因為有富岡火車頭个利便，所以大體在地个後生人，高中讀書時節斯會離開家鄉，去到外地就學發展，113年伯公岡發展第一齣用海陸腔為主个原創客語戲劇，就係講客家青年，因爭有鐵路，在伯公岡去台北打拚發生个故事。
講著愛來做客語戲劇个初衷，其實斯想推動客語社區營造，雖然有當多種形式做得做，最好个方式，就係生活中大自家全自然講客，但係因為這下工商社會，人口組成緊改變，長透聽長輩講，20年前伯公岡街路，學生放學對話打嘴鼓全講客，這下嗄全部講華語咧，無頭擺恁樣自然講客个環境，所以正會講愛重新拈轉講客个意識，戲劇斯係當生趣傳承个做法。
戲劇創作元素結合「鐵路」、「水圳」摎「伯公信仰」，主題安到「阿婆摎阿興牯」，希望透過全客語个方式，連結老中青三代無共樣年紀个伯公岡人，用講客个方式做戲來傳承客家文化，𠊎俚邀請客話先生「邱鴻春」、戲劇先生「簡宇君」、音樂先生「陳虹珈」，三儕先生用自家个專業分這齣客語音樂戲劇做到精彩、鬧熱煎煎，這係第一擺大膽个試驗，因為頭擺客家戲劇，會分人想著係客家大戲該種形式，當承蒙共下完成个恁多好朋友。
戲劇先用搞水起勢，講頭擺大人細子共同个回憶-陂塘，續等講著主角阿興牯想愛坐火車去台北打拚尋頭路，毋過阿爸毋同意，阿婆斯講愛來跌筊請示伯公，阿興牯一擲斯聖筊，這就係講地方莊頭伯公信仰个重要，中央堵著事業个無順序，客家後生人阿興牯來到台北，顛倒開始尋自家个根，用「轉屋下」這條歌來做收尾，分大自家來思考自家个理想係麼个？
經過歸年个排練正慢慢合線，毋單淨9月份在富岡國小進行「共下來做戲」成果發表，餳咧成百儕社區鄉親，共下來欣賞講客，還在12月28全國客家日這日，桃園市南桃園客青交流協會（富富·小山岡），安排在大伯公廟坪前舉辦「伯公岡來做戲_老中青傳承來講客」擔任最尾个演出，做戲、跳舞加唱歌，用音樂劇个方式，講出伯公岡平常時个生活當中，當有感情个大細事，長透聽人講外國个月光會較圓，恁樣看起來，自家家鄉个月光，係毋係還較圓還較靚？
華語
富岡一直以來由於有富岡火車站的便捷，所以大多數在地年輕人，高中讀書的時候就會離開家鄉，去到外地就學發展，113年富岡發展第一齣以海陸腔為主的原創客語戲劇，說的就是客家青年，因為有鐵路，從富岡前往臺北打拚發生的故事。
說到要創作客語戲劇的初衷，其實是想要推動客語社區營造，雖然有很多種形式可以做，最好的方式，就是生活中大家自然講客家話，但因為現在工商社會，人口組成不斷改變，常常聽長輩說，20年前富岡街區，學生放學對話閒聊全部講客家話，但現在卻全部講華語，沒有從前這樣自然講客家話的環境，所以才會說要重新撿回講客家話的意識，戲劇就是一種很有趣傳承的做法。
戲劇創作元素結合「鐵路」、「水圳」和「土地公信仰」，主題叫做「阿婆和阿興牯」，希望透過全客語的方式，連結老中青三代不同年紀的富岡人，用講客語的方式演戲來傳承客家文化，當中邀請客語老師「邱鴻春」、戲劇老師「簡宇君」、音樂老師「陳虹珈」，三位老師以各自的專業為這齣客語音樂戲劇再加入更多精彩熱鬧的元素，這是第一次大膽的實驗，因為過去客家戲劇，會讓人聯想到像客家大戲的形式，很感謝一起完成的這麼多好朋友。
戲劇先用戲水鋪陳，講以前大人小孩共同的回憶-池塘，然後主角「阿興」想搭火車到台北來打拚找工作，但是爸爸不同意，阿婆說要來擲筊請示土地公，阿興一擲就聖筊，講的是地方村庄土地公信仰的重要，中間碰到事業的不順利，客家年輕人「阿興」來到台北，反而開始在尋找自己的根，用「轉屋下」音樂來做收尾，讓大家思考自家的理想是什麼？
歷經整年的排練才慢慢培養出默契，不只9月份在富岡國小進行「共下來做戲」成果發表，吸引了近一百名社區鄉親，一起來欣賞講客語，還在12月28日全國客家日這一天，桃園市南桃園客青交流協會（富富·小山岡），安排在妙靈宮廣場前舉辦「伯公岡來做戲_老中青傳承來講客」擔任壓軸演出，演戲跳舞加唱歌，用音樂劇方式，說出富岡在地平常生活中，很有感情的大小事，常聽人說外國的月亮會比較圓，這樣看起來，自己家鄉的月亮，是不是更圓又漂亮？
