文／羅雪霞，東勢出世，現下戴東勢，講大埔腔，這滿在東勢區一心幼兒園當廚工。
逐個人在生活个過程中，輒輒會堵著無納意个事，成半下會堵著艱苦困難个事，抑係歡喜生趣个事，每一個人个生活過程做下無共樣。
𠊎戴在田莊農家子弟，屋面前係闊闊个大禾埕，屋邊脣有歸大片个田坵，乜係吾等細人時節搞尞个遊樂場，見擺若係堵著歇睏日，斯會同上家下屋个細孲喊偎來，歸陣細人共下搞踢鏮鏮、跳格、搞他瑪、跳索、抑係在田坵肚搞囥人尋𤌍窯等等，實在還生趣哦！
有一擺吾等三兄弟在屋面前个大禾埕搞踢鏮鏮，吾等比賽看麼人踢盡遠，阿哥生來較高大，較有力，無堵好同鏮鏮踢落崁下，𠊎同老弟斯落去崁下𢯭手尋，吂知鏮鏮無尋著，老弟嗄看著一尾蛇哥，老弟同𠊎咻咻滾緊噭，嚇到會死，因致蛇哥係𠊎盡驚个動物，阿哥聽著吾等个噭聲，正遽遽行偎來安慰吾等：「毋使驚，毋使驚，蛇哥走撇咧！」
記得有一年个暑假，屋邊脣个禾割撇咧，吾等歸陣細人在田坵肚𤌍番薯，吾等分工合作，有人摟窟，有人疊泥矻來結窯，有人拈燥葉、燥樵準備來起火，同火燒畀猛猛，大火過出火炭咧，將一條一條个番薯放下去，封好窯門，同泥矻𢫦 拶，還對窯頂𢫦幾下到，總算完成咧！
這下吾等歸陣个細孲斯在田坵肚搞囥人尋，有人囥在稈棚下，有人囥在崁下，還有人跋上田脣高高个樹頂囥，歸陣細人在田坵肚飆上飆落，搞到汗流脈落，搞到歸身泥棍棍，毋過，逐儕做下搞到歡喜轟天，暢到耐毋得。
到該下晝，遠遠傳來香馞馞个番薯香，使得開窯哩喲！吾等同窯肚个番薯一粒一粒揙出來，哇！該餳个味瑞實在還香啦！逐個怕係肚屎枵咧！同燒熝熝个番薯相搶泌背，你一粒，𠊎一粒，食落肚，逐個食到飽𩜰𩜰。
搞到斷烏都還毋知好轉，等到阿姆擎緊竹修出來尋人咧，正毋甘願無結無煞轉屋家，心肝肚愐，壞咧！這下轉屋家，皮斯愛弓較緪兜，吂知阿姆顛倒無打吾等，乜無罵吾等，還講歸身搞到烏疏疏，遽遽去洗淨俐來，愛準備食暗餐咧！
回憶頭擺个事，戴在莊下自在个生活，共下行過个腳跡，搞過个生趣事，永久印在吾腦膈肚，乜係𠊎盡懷念个童年。
華語
每個人在生活的過程中，時常會遇到不如意的事，有時會遇到艱難的事，還有高興或有趣的事，每個人的生活過程都不一樣。
我是住在田莊的農村子弟，屋前有寬寬的大操場，屋邊有一大片田地，也是我們小孩玩耍的遊樂場。每次如果遇到假日，就會跟鄰居小孩一起玩，大夥一起玩踢罐子、跳格子、玩彈珠、跳繩，或是在田裡玩捉迷藏，燜烤地瓜等等，實在真有趣喔！
有一次，我們三兄妹在屋前的大操場玩踢罐子的遊戲，我們比賽看誰踢得最遠，哥哥長得較高大、較為有力，不小心把罐子踢到懸崖，我和弟弟就下去懸崖幫忙找，誰知道罐子沒有找到，弟弟卻看到一條蛇，弟弟和我又叫又哭，嚇得半死，因為蛇是我最怕的動物，哥哥聽到我們的哭叫聲，趕緊過來安慰我們，「不用怕，不用怕，蛇已經離開了」。
記得有一年的暑假，屋邊的稻子割掉了，我們一群人在田裡烤地瓜，我們分工合作，有人挖洞，有人疊泥塊來做窯，有人撿樹葉和木柴來起火，把火燒得大大的，大火燒過，變成木炭，再把一條一條的地瓜放進去，封好窯門，把泥團拍打，還對窯頂拍幾下，總算完成了。
這時，我們一群小孩就在田裡玩捉迷藏，有人躲在稻草堆裡，有人躲在崖下，還有人爬上田邊高高的樹上躲，一群人在田裡跑來跑去，玩到全身汗，玩到整身都是泥漿，不過，大家都玩得非常開心，高興得不得了。
到了下午，遠遠傳來香噴噴的地瓜香，可以開窯了，我們把窯裡面的地瓜一一粒一粒的翻出來，哇！那吸引人的味道，實在太香了，每個人好像肚子餓了，互相爭食熱騰騰的地瓜，你一粒，我一粒，吃下肚，個個都吃得很飽。
玩到很晚還不肯回家，等到媽媽拿竹子出來找人，才心不甘情不願的回家，心想，糟糕了，這下回家肯定被修理了，誰知道媽媽反倒沒有打我們，也沒有罵我們，還說，全身玩到髒兮兮的，趕快去洗乾淨，準備吃晚餐了。
回憶以前的往事，住在田莊自在生活，一起走過的腳印，玩過有趣的事，永遠烙印在我腦海中，也是我最懷念的童年往事。
