文／田淑芬，台南市客語支援教師，新竹竹北人，這下戴台南市（海陸腔）
人講：「秋有月華冬有雪，春有百花夏有風」。冷天堵著寒流，高山𠖄等一領灰白个𠖄衫，在台灣罕得看著个景色！這就係白色个冷天！春花開，天時變好，樹椏開始綻新芽，滿那仔百花開，人人乜跈等心花開咧！這就係紅羅花色个春天！夏日風，熱𤐰燒暖个風吹著人昏哆昏哆、做麼个都懶頭！這就係黃色个熱天！秋天氣溫涼爽舒適，人个心情好，八月半个月華看起來就特別圓特別靚！
假使四季有專屬个色，該秋天就係紅色咧！仰般講呢？！九到十一月个水果無像其他季節恁多，除忒八月半愛食个柚仔，還有紅釘釘个柿仔，生在無幾高个柿仔樹項，一隻隻紅冬冬實在還餳人食啊！秋天一到，細孲仔个面頰卵分風吹到紅紅，看起來實在當得人惜！原來係新竹个名產之一九降風起咧！
還細个時節，𠊎兜最好食軟濟濟个紅柿，甜甜又多汁个味道在嘴肚噼開，逐儕食到笑咪咪；較大咧，嗄變做好食水柿，不過有時會食着有兜澀澀，過後正知頭擺食个係愛走澀水正做得食个柿仔，像牛心柿、筆柿摎石柿這兜；這下在市場肚大體賣个係日本甜柿个品種，食起來甜甜脆脆，到今還吂食着毋好食个。
毋過𠊎最好食个還係甜甜个柿餅，還識䟓工走去新埔看人做柿餅，對新埔街路到旱坑無幾久，車仔緊駛往上，路越來越細條，路脣毋知名个樹仔濃濃，斡過幾隻彎就到柿仔觀光工廠咧！先看着个係老頭擺戴个伙房屋，行較兼兜還鼻得着淡淡燒樵羴，原來係工廠用牛眼樹樵在該焙柿仔，行較落兜就看着歸大遍黃淰淰个柿仔，一隻隻放在毛籣裡肚在該做日光浴，日頭花透過縫仔箭啊下來，一粒粒圓圓个影仔在地泥下看起來斯像一幅現代幾何圖樣。
好天時蹶上二樓觀景臺，對頂高看往下，柑黃色个柿仔斯像一片黃金海，背景有白白个雲、藍藍个天、還有青青个山，看過去講有幾靚斯有幾靚，係講無人在脣頭出聲，還正經會看入魂咧！工廠裡肚个人無閒直掣、手腳無停在該削、晒、揙、焙柿仔，還不時愛摎柿餅做「馬殺雞」，現場還有柿餅做得試食，品種已多，口感乜無共樣，儘採你擇，大家聽著柿餅食嗽對氣管當好，全部尖共下七手八腳在該搶，斯像毋使錢樣。
係講還有時間，工廠肚還做得學柿染，柿仔水係用愛掉忒个柿仔還有柿仔皮做个，這自然無毒又做得再過利用，大自家發揮創意做出獨一無二个作品；乜做得參觀果園，主人還講種柿仔愛「盼得」，愛先過正做得分逐隻柿仔都有當好个養分，正種得出又靚又甜个柿仔。有閒个時節，來一輪柿仔个故鄉接觸大自然，還做得在客家庄食着當湛斗个料理，定著分你有淰淰个收穫。
華語
前人說：「秋有月亮冬有雪，春有百花夏有風」。冬天遇到寒流，高山批著一件灰白的披風，在台灣是罕見的景色！這就是白色的冬天！春花開，氣溫回升、天氣變好，樹枝開始冒新芽，到處百花齊放，人們也跟著心花開了！這就是紅羅花色的春天！夏日風，熱呼呼的風吹到人昏昏沈沈、做什麼都懶懶散散的！這就是黃色的夏天！秋天氣溫涼爽舒適，人的心情好，中秋節的月亮看起來就特別圓特別漂亮！
假如四季有專屬的顏色，那秋天就是紅色了！怎麼說呢？！九到十一月的水果不像其他季節這麼多，除了中秋節要吃的柚子外，還有火紅色的柿子，長在不高大的柿子樹上，一個個紅咚咚的實在好吸引人啊！秋天一到，孩子們的雙頰被風吹到紅通通，看起來實在好可愛！原來是新竹的名產之一九降風起了！
還小的時候，我們最喜歡吃軟嫰的紅柿，甜甜又多汁的味道在嘴裡炸開，每個人吃到笑咪咪；長大時卻變成喜歡吃水柿，不過有時會吃到澀澀的口感，後來才知道以前吃的是要「去澀」才可以吃的柿子，像牛心柿、筆柿和石柿等；現在在市場裡大多賣的是日本甜柿品種，吃起來甜甜脆脆，目前還沒吃到不好吃的。
不過我最喜歡吃的還是甜甜的柿餅，還曾特地去新埔看人製做柿餅，從新埔市區到旱坑沒多久，車子越往上開，路越來越小條，路邊不知名的樹長得很茂密，繞過幾個彎就到柿子觀光工廠了！先看到的是傳統的三合院，走近一點還聞得到淡淡燒柴的味道，原來是工廠用龍眼木在烘柿子，再走進去就看到一大遍黃澄澄的柿子，一個個放在毛籃裡做日光浴，陽光透過縫隙灑落下來，一顆顆圓圓的影子在地板上印出一幅現代幾何圖。
好天氣時爬上二樓觀景臺，從高處往下看，柑黃色的柿子就像一片黃金海，背景有白白的雲、藍藍的天、還有青綠的山，看過去真的美極了，要是沒人在旁邊出聲，還真的會看出神呢！工廠裡的人手忙腳亂不停地在削、晒、翻、烘柿子，還不時要幫柿餅「馬殺雞」，現場還有柿餅可以試吃，品種很多，口感也不盡相同，任君挑選，大家聽到柿餅治咳嗽對氣管很好，全部擠成一堆七手八腳搶翻天，像免費的一樣。
要是還有時間，工廠裡還可以學做柿染，柿汁是用要丟掉的柿子還有柿子皮做的，自然無毒又重覆利用，大家發揮創意做出獨一無二的作品；也可以參觀果園，主人還說種柿子要「捨得」，適當「疏果」才可以讓每個柿子都有很好的養分，才種得出又美又甘甜的柿子。閒暇之餘，來一趟柿子的故鄉接觸大自然，還可以在客家庄品嚐很道地的料理，一定讓你有滿滿的收穫。
