文／張瑞珍，新北市新店區中正國小退休、目前擔任中正國小客語支援教師（海陸腔）
人講：世界上最甜个毋係糖，係幸福，𫣆俚輒常會收著別儕个祝福，祝福𫣆俚幸福快樂，但係您有想過無？幸福係麼个？ 幸福毋係你有幾派頭个屋，係一家人在屋肚个笑聲有幾多，幸福毋係你有幾貴个車仔，係你渡等屋下人出去尞做得平安轉屋下。
今年八月，𠊎个侄子利用兩個細人仔放避暑，歸屋下人歡歡喜喜去日本尞，一路項，細人仔像玲琅个笑聲跈等旅行團流轉，無想著好點點做阿爸儕因為食東西哽著，急救毋掣嗄過身忒，一家人對天堂跌落地獄，愁勞博激無結無煞，一個47歲个工程師就恁樣離開佢原本美滿个家庭，人生个無常，實在分人盡難接受。
記得有一擺，𠊎轉去老屋看阿姆，𠊎兜兄弟姊妹湊等去爬山，𫣆俚行過彎彎斡斡个山路，一步一步蹶上山頂，看著山頂高天天个樹仔，山下一垤一垤青溜溜个禾田，想著老古人言講个：前人種樹後人涼，前人種竹後人搖，𠊎試著自家盡幸福，做得食著無愁，涼涼个山風對對面項吹過來該下，𠊎心肝頭淰淰个感動，還有對𠊎爺哀、對老祖先還有這天地，深深个感情摎感恩。
對𠊎來講，一生人盡輒常體會著幸福个好味緒，像細个時節破竹笐仔買新衫，雖然該衫褲係大幾號个，褲腳摺了又摺，揇等該新衫，睡目斯會笑哦! 另外還過戀愛个時節、第一擺做阿姆个時節、細人有孝𫣆俚个時節，全部有𠊎淰淰个幸福味緒；這下老了，𠊎試著身體康健無病無痛，還做得去繞山花就係最幸福个。這擺侄仔个意外分𠊎更加體會到，𫣆俚愛把握𫣆俚現下有个，珍惜做得摎屋下人共下个時間。
人講：「春有百花秋有月，夏有涼風冬有雪；若無閒事掛心頭，就係人間好時節。」既然人生無常，𫣆俚愛學習客家人知足、樂觀个生活態度，發揮生命个光摎熱，用正面个態度看事情，相信恁樣𫣆俚个人生就會花開滿園自然香，逐日斯會有幸福个好味緒。
華語
人們說：世界上最甜的不是糖，而是幸福。我們常常會收到別人送來的祝福，祝福我們幸福快樂，但你有想過嗎？幸福是什麼？幸福不是你擁有多大的房子，而是家人之間有多少笑聲；幸福不是你擁有多貴的車子，而是你能帶著家人平安愉快地外出旅行。
今年八月，我的侄子帶著兩個小孩放暑假，全家人開開心心地去日本旅遊。一路上，小孩銀鈴般的笑聲隨著旅行團流淌，沒想到突如其來的變故，父親因為吃東西卡住喉嚨，急救不及過世，讓這個原本幸福的家庭陷入了無盡的痛苦。那位47歲的工程師就這樣永遠離開了他原本幸福的家庭，人生的無常，真是讓人難以接受。
我記得有一次，我回到老家看望母親，帶著兄弟姊妹一起去爬山。我們走過彎彎曲曲的山路，一步步爬上山頂，看到山頂上挺拔的樹木，山下是一片片綠油油的稻田。想著老祖宗的話：「前人種樹，後人乘涼；前人栽竹，後人搖。」我覺得好幸福，能不愁吃不愁穿，當涼爽的山風吹來，我的心中充滿了感動，對祖先和這片土地的感激之情油然而生。
對我來說，一生中常常能夠感受到幸福的味道，像是小時候剖竹存錢筒買新衣服，雖然衣服大幾號，褲腳摺了又摺，卻還是穿得開心，抱著它睡覺時還會笑出來！還有戀愛的時光、第一次做母親的時光、孩子孝順的時光，所有的這些都是我珍貴的幸福時刻。現在老了，我嘗試保持健康，無病無痛，能夠去散步就是最大的幸福。這次侄子的意外讓我更加體會到，應該把握當下，珍惜與家人共度的時光。
人們說：「春有百花，秋有月，夏有涼風，冬有雪；若無閒事掛心頭，就是人間好時節。」既然人生無常，我們應該學習客家人知足常樂的生活態度，發揮生命的光和熱，用正面的態度看待事情，相信只要保持這樣的心態，我們的人生就會如花盛開，散發出自然的香氣，每一天都會有幸福的味道。
