文／張秀娥，社區關懷據點客語老師、國中小客語支援教師（四縣腔）
頭家娘、頭家娘，遽遽遽，較遽兜仔，大阿姑仔強摎𠊎在眠床頂拉下來，三步做兩步行，緊張到話就講到迪迪凸凸，今愛仰般正好、仰般正好，壞淨淨咧！
這就係𠊎个大阿姑仔，不時會頭拿秀逗，成時又比鬼較精，因為外甥係單丁子，身體又毋好，照顧厥姆實在耐毋何，雖然有請看護，毋過係來一個走一個，全做毋核乜識送去養老院又吵到歸院項个人無辦法好好睡目，日時頭又抽胲另命放勢喊，戴無兩日就通知渡轉屋下，倈仔看著這情形煞煞渡去醫院詳細檢查，正知係失智个症頭。
大阿姑仔人本旦就盡有愛心，吾老公係最細，佢長女如母樣對老弟非常照顧，過後老弟結婚，續等有大細買屋地項項愛錢經濟實在有困難，故所識摎佢週轉錢銀，今外甥一通電話打來，拜託阿舅、阿舅姆想辦法，人講食果子拜樹頭、食米飯拜田頭，𠊎兩公婆決定摎佢接來屋下，共下生活看啊了，大阿姑仔歲數堵堵上九十，自來這歇後心情蓋好，屋下乜鬧熱起來，莫看佢恁多歲行路起來毋輸後生人，做得歸日摎人打嘴鼓，食飯像貓食兩口就飽，零搭乜準飯食，過一駁仔發現佢輒常一儕人坐等緊講緊笑，人行到厥面前乜無感覺，歸隻人戇神戇神，𠊎摎老公講，若姐看起來怪怪愛注意喔！
斷真有一暗晡，半夜兩三點，聽著佢在暗摸胥疏个灶下，謦謦鏘鏘打碗櫥、開冰箱、揙拖箱仔，唸等一碗兩碗愛鬥七碗，罅了，好勢了，遽遽來燒香，𠊎在眠床驚到毋敢出聲，等毋得天光行去食飯間，該桌項排等碗菜、糖仔、蠟燭、滿哪仔仔，過再行去厥間項，佢歸隻人睡到呼呼滾，看著又好笑。
自這過後就輒常半夜作怪，像火燒屋啦、警察捉人啦、半夜吵愛出門等等，看起來失智个症頭越來越嚴重，高不將定下心來，摎佢共下融入厥个世界盡量分佢過得快樂。
有一日外甥打電話來講，厥身體這下有較砸身，當感謝阿舅、舅姆个辛苦 手照顧，今愛接阿姆轉去歇了，有申請政府个長照居家服務，摎喘息服務个資源，行一步算一步，好得有政府德政，對照顧者或者失智者，有盡大个幫助，毋過，未來愛面對个考驗還蓋多，大阿姑仔加油！外甥加油！
華語
老闆娘、老闆娘，快快快、快一點呀！大阿姑硬要把我從床上拉下來，三步做兩步走，緊張到說起話來都嘀嘀咕咕，現在要怎麼辦才好？要怎麼辦才好？糟了啦！
這就是我的大阿姑，經常頭腦會秀逗，有時又比誰都聰明，因為外甥是獨生子，身體又不好，照顧他媽媽實在奈何不了，雖然有請看護，不過來一個跑一個都做不住，也曾送去養老院又吵到全院內的人沒有辦法好好睡覺，白天又會大吼大叫，住了兩天就被院方通知帶回家去，兒子看到這情形，於是趕忙到醫院為媽媽做詳細檢查才知是失智的症狀。
大阿姑原本就很有愛心，我老公排行最小，她長女如母般對小弟非常照顧，不久小弟結婚接著有小孩、買房地等等都要用錢，經濟實在有困難，於是有向她借錢週轉，今外甥一通電話打來，拜託舅舅、舅媽幫忙想辦法，常言道吃果子拜樹頭、吃米飯拜田頭，我兩夫妻決定將她接來家裡一起生活看看，大阿姑歲數剛上九十，自來到小弟家後心情非常好，屋子也熱鬧起來，不要看她那麼多歲數走起路來不輸年輕人，她可以整天跟人聊天，吃飯像貓吃兩口就飽，零嘴也當飯吃，過一陣子發現她經常一個人坐著邊說邊笑，人走到她面前也沒有感覺，整個人呆呆傻傻，我跟老公說，你姊姊看起來怪怪要注意喔！
果然有一個晚上，半夜兩三點，聽到她在烏漆麻黑的廚房裡，鏗鏗鏘鏘打碗櫥、開冰箱、翻箱倒櫃，唸著一碗兩碗共七碗，夠了，可以了，趕快來燒香，我在床上害怕到不敢出聲，好不容易等到天亮走去吃飯間，那桌上擺著碗菜、糖果、蠟燭，到處亂糟糟，再走去她房間，她整個人睡得呼呼叫，看到又好笑。
自從這過後就經常半夜做怪，像火燒房子啦、警察捉人啦、半夜吵著要出門等等，看起來失智的症狀越來越嚴重，只好定下心來，跟她一起融入她的世界，盡量給她過得快樂。
有一天外甥打電話來說，他身體現在有較強健，非常感謝舅舅、舅媽的辛苦幫忙照顧，今要接媽媽回家住，有申請政府長照居家服務與喘息服務的資源，走一步算一步，還好有政府德政，對照顧者或者失智者，有很大的幫助，不過，未來要面對的考驗還非常多，大阿姑加油！外甥加油！
