文／邱鴻春，客語文薪傳師，桃園楊梅伯公岡客家人（海陸腔）
雞啼半夜就出門，做到斷烏正轉屋，這就係頭擺人「耕田又耕埔，做到兩頭烏」一日个生活，無像這下人恁好命，上班食頭路一日就八點鐘定，加做个時間會另外算加班費，勞基法還有規定，一隻月加班做毋得超過四十六點鐘。
前幾日在莊下路項看著，無幾遠个田當在該割禾，就摎車仔停下來，就行該田脣路落去看，看著兩台割禾機當在該割禾，脣頭跈跈揫一群个鳥仔，頭探探在該食蟲蚩，實在盡生趣。
兩台割禾機个穀淰咧，就會駛到路脣來，割禾機个抽穀笐仔就會捩過來，對準該台載穀个貨車，摎穀抽到該貨車頂去，除了駛貨車个司機以外，還有一位頭那包塞塞个婦人家，在該脣項操作空拍機，還渡等一個怕三、四歲个細倈仔，一下司機下車來，行出來一個晒到烏刻刻个細阿哥仔，𠊎先用客語摎佢講話打招呼，佢用華語講，毋係本地人毋曉講客，𠊎正用華語摎佢交談，有講駛割禾機个兩儕正係本地人，毋過駛割禾機儕無閒，就無摎佢兜講著話。
這細阿哥雖然晒到盡烏，講話口氣感覺還已細人性，一看斯知絕對無超過三十歲，甚至可能正二十五歲上下仔，𠊎問佢，該係若餔娘摎你个細人無？佢斷真回答係，黏時試著這係一件當幸福个事情。
六十無孫，老樹無根。相信這道理大家都了解，但係這下後生人，當有自家个想法，普遍慢結婚甚至毋結婚，乜有結婚毋降儕，甘願畜狗畜貓，實在就毋係當好个現象！超高齡社會緊來緊嚴重，六十歲以上个鄉親朋友，到今吂討心臼、吂做阿公阿婆儕，了了係呀！孟子講：不孝有三，無後為大。希望這兜讀書人會覺醒，毋好分世大人講，讀書讀到哪位去了！
在現今社會，今晡日做得看著這對後生公婆，毋驚大日頭下个辛苦，同心來打拚，見證著老古人言講个：嫁雞跈雞飛，嫁狗跈狗走个溫馨畫面，實在無簡單，盡值得人欽羨阿腦啊。
期待有緣人看著，會有多少仔共鳴、感動、衝動。毋過乜愛提醒一下，老話也有講：娶妻莫貪靚，嫁女莫貪財。嫁著郎當郎，想斷心肝想斷腸。嫁著好兒郎，日夜好參詳。這係提醒青年男女交往對象，目珠一定愛擘金來，尤其係細妹人哦。
華語
雞啼天未亮就出門，做到天黑才回家，這就是以前人「耕田又耕埔，做到兩頭黑」一天的生活，不像現在人那麼好命，上班一天只有八小時而已，超出的時間會另外算加班費，勞基法還有規定，一個月加班不可以超過四十六小時。
前幾天在鄉下路上看到，不遠處的田正在割稻，就把車子停下來，就沿著田埂走進去看，看到兩台割稻機正在割稻，旁邊跟著一群的小鳥，頭低低的在吃蟲子，實在很有趣。
兩台割稻機的穀滿了，就會開到路邊來，割稻機上的抽穀子管子就會轉過來，對準那台載穀的貨車，把穀子抽到那貨車上去，除了開貨車的司機以外，還有一位頭上臉上都包著頭巾的婦人，在那旁邊操作空拍機，還帶著一位可能三、四歲的小男生，一下司機下車來，走出來一位曬到很黑的男生，我先用客語和他講話打招呼，他用華語講，不是本地人不會講客語，我才用華語和他交談，有講開割稻機的兩位才是本地人，不過開割稻機的沒空，就沒和他們講到話。
這男生雖然曬到很黑，講話口氣感覺還很年輕，一看就知道絕對沒超過三十歲，甚至可能才二十五歲左右，我問他，那是你老婆和你的小孩嗎？他真的回答是，馬上覺得這是一件很幸福的事情。
六十無孫，老樹無根。相信這道理大家都了解，但是現在年輕人，很有自己的想法，普遍慢婚甚至不婚，乜有結婚不生的，寧願養狗養貓，實在就不是很好的現象！超高齡社會越來越嚴重，六十歲以上的鄉親朋友，還沒有娶媳婦、還沒做爺爺奶奶的，有很多呀！孟子曰：不孝有三，無後為大。希望這些知識份子能覺醒，不要給家長說，書讀到哪裡去了！
如今的社會，今天可以看到這對年輕夫妻，不畏太陽底下的辛苦，同心來打拚，見證了前人所講的：嫁雞跟雞飛，嫁狗跟狗走的溫馨畫面，實在不簡單，很值得人欽佩羨慕稱讚啊。
期待有緣人看到，會有一點共鳴、感動、衝動。不過也要提醒一下，客家諺語也有說：娶妻莫貪美，嫁女莫貪財。嫁到遊手好閒郎，想斷心肝想斷腸。嫁到好兒郎，日夜好商量。這是提醒青年男女交往對象，眼睛一定要放亮一點，尤其是女生喔。
